BAGUIO CITY – Maisubli sadiay Sablan, Benguet ti disso ti singasing a multi-billion waste to energy project babaen iti maysa a renewable energy corporation.
Daytoy ket kalpasan nga immanamong ti komunidad ken dagiti opisyales ti munisipyo a sadiay a maibangon ti nasao a pasilidad.
Sigun kenni Mayor Benjamin Magalong, dakkel a banag ti nagbalin a desisyon dagiti umili ken opisyal ti Sablan a makatulong iti permanente a panangrisut dagiti lokal a gobyerno ti Baguio-La Trinidad-Itogon-Sablan-Tuba-Tublay wenno BLISTT iti agpapada a parikut dagitoy iti panakaibelleng dagiti basura.
Nupay kasta, inaklonna a tubtubngaren ti kapitan ti puntirya a host barangay ti nasao a proyekto isut gapuna a manarimaan ti addang tapnu marisut ti isyu.
Maibasar iti plano, ti singasing a waste to energy plant ket makabael a mangiproseso iti agarup 500 a tonelada ti naglalaok a basura tapnu mapataud ti 10 megawatts ti kuryente iti innaldaw babaen iti panaka-aramat dagiti kabaruan a teknolohiya a saan a makadadael iti aglawlaw.
