ITOGON, BENGUET – Pimmusay ti driver bayat a nadangran ti lima nga indibidual kalpasan a naiyanud iti Agno River ti SUV a naglugananda sadiay Sitio Tabu, Dalupirip, Itogon Benguet idi March 27, 2026.
Malaksid iti dayta, napukpukaw paylaeng ti maysa kadadagiti pasahero.
Nabigbig ti pimmusay a ni Mr. Rodolfo Ong Tan, 68 years old a residente iti No 134 Session Road, BC.
Naideklara daytoy a dead on arrival gapu iti “Traumatic Brain Injury secondary to road crash incident” babaen iti attending physician a ni Dra Walsi-en ti Itogon District Hospital.
Karaman kadagiti pasahero a nadangran ket pakairamanan ni Ren Toginay Munoz, 45 years old, naasawaan, salesman ken residente iti Pinget, Baguio City; Eliza Pelengen Consul, 59 years old, single, photographer ken residente ti General Luna, Baguio City; Conrado Cueto Rotor, 66 years old, naasawaan, retired Government Employee; Randy Mata Benigno, 49 years old ken residente iti Sarok Camp 7, Baguio City.
Kabayatanna, mapukpukaw paylaeng ni Mr. Neil Clark Ongchangco, naasawaan ken empleyado ti Public Information Officer (PIO) ti siudad ti Baguio a residente iti Loakan, Baguio City.
Iti pannakiuman ti Bombo Radyo iti Itogon Municipal Disaster Risk Reduction and Management Office (MDRRMO), manarimaan paylaeng ti maisaysayangkat a search and rescue operation babaen kadagiti civilian local divers, Barangay Dalupirip DRRM, BFP Itogon, MDRRMO ken PNP Itogon.
Sigun iti Itogon MDRRMO, naireport ti insidente iti 1:50 p.m ken nasarakan ti lugan iti pasado 3:48 p.m.
Iti agdama, agpatpataming dagiti lima a nadangran iti Itogon District Hospital.
Maibasar iti inisyal nga imbestigasyon, padalyasat ti lugan iti nasao a karayan ngem naiyanud iti agarup 100 meters manipud iti orihinal a posisyon daytoy gapu iti napigsa nga ayus ti danum ken ti dagus a panagngato ti libel ti danum.
Nagtaud dagiti biktima iti Tabu Elementary School, Dalupirip, Itogon, Benguet para iti pictorials dagiti graduates a paset ti sponsorship nga aktibidad dagitoy.
Iti kaudian a report a naawat ti Bombo Radyo, nasarakan ni Mr. Neil Clark Ongchangco ken naiturong iti Itogon District Hospital.//mp4
