Pinaglibakan ni Albay 1st District Representative ken nangisurat iti Divorce Bill a ni Edcel Lagman a saan a mangdadael iti pamilia ti divorce law, agsipudta nadadaelen ti maysa a pamilia sakbay a mangipila ti agasawa iti divorce.
Inyunay-unay ni Lagman a ti nasao a gakat ti kasayaatan a wagas tapno mawaswas ti kasar a nabayag a saan a naragsak ken mangisalba iti maysa a tao manipud iti panangabuso iti panagasawa, kinaawan kinamatalek ken panangbaybay-a a mangdadael iti panagkallaysa.
Iti sidong iti nasao a gakat, agpada dagiti pangibatayan iti legal separation ken annulment, nupay kasta maikkan dagiti diborsiado nga assawa iti kalintegan a makiasawa manen, saan a kas iti legal separation.
Karaman kadagiti pakaibatayan iti pangipila iti diborsio ti pisikal a kinaranggas wenno nakaro a panangabuso kadagiti asawa wenno anak, drug addiction, habitual alcoholism, wenno chronic gambling, homosexuality, marital infidelity, ken panangbaybay-a nga awan ti nainkalintegan a rason iti nasurok a makatawen.
Malaksid iti dayta, mapalubosan pay a mangipila iti diborsio dagiti agassawa a nagsina iti nasurok iti lima a tawen ken dadduma pay.
