Manarimaan ti panagpaagas ti health advocate a nagkandidato ti kina-bise presidente idi Eleksion 2022 a ni Doc. Willie Ong gapu ti pannakadayagnosna iti kanser.
Ni Ong nga am-ammo iti kaaduan a “Doc Willie” ket impablaakna ti sitwasion daytoy iti social media account-na ita laeng a Sabado.
Sigun kenkuana, naduktalan dagiti doktor nga addaan daytoy ti 16 x 13 x 12 centimeter sarcoma iti tiyan daytoy, ken nakalemmeng iti likudan ti pusuna ken sanguanan ti “spine” daytoy.
Impakaamona pay a ti bukol ket dakkel, ken maysa kadagiti kadakkelan a naimatangan.
Ti video ket nairekord manipod iti ospital room idiay Agosto baente nuebe, ngem ti pannakairuar daytoy ket naitantan gaputa serioso ken komplikado ti pannakaipasidongna iti “chemotherapy.”
Mailadawan ti sakit a “sarcoma” kas sapasap a termino para iti nalawa a grupo dagiti kanser a mangrugi kadagiti tulang ken kadagiti nalukneng wenno agkonektar a tisyu.
Iti tengga ti karit iti salun-at ni Ong, positibo latta daytoy iti panagbiag.
Maipalagip nga idi 2022, ni Ong ti kadua ti sigud a Mayor ti Manila a ni Iskor Moreno iti kandidato ti kinapresidente iti sidong ti partido ti Aksyon Demokratiko.
Nagserbi pay daytoy kas “consultant” ti Department of Health manipod 2010 agingga 2014.
