Manamnama a malukatan ti Doctor of Medicine Program iti Benguet State University (BSU) para iti academic year 2026-2027.
Daytoy ket kalpasan nga inaprobaran ti Commission on Higher Education (CHED) ti aplikasyon ti Benguet State University (BSU) a mangpataray iti first ken second-year levels ti Doctor of Medicine Program.
Naaprobaran ti aplikasyon babaen iti panagtungpal ti BSU iti minimum requirement iti sidong ti CHED Memorandum Order No. 18, series of 2016 on Policies, Standards, and Guidelines for the Doctor of Medicine Program.
Kasaruno daytoy iti nainget a panagsukimat ken deliberasion ti CHED Office of Programs and Standards Development ken Technical Panel for Medicine.
Karaman ti BSU kadagiti lima nga State Universities and Colleges (SUCs) a fully compliant iti nasao a minimum requirement.
Iti agdama, ti BSU ti kaunaan nga SUC iti rehion nga addaan iti medical program.
Ti nasao nga addang ket maitunos iti direktiba ni President Ferdinand Marcos Jr. a palawaen ti medical and nusing education programs.
Maitunos metlaeng daytoy iti panggep a manayunan dagiti healthcare professionals ken masolusionan ti kinakurang dagiti medical doctors iti pagilian.
