Maragsakan ti direktor ken producer iti maysa a pabuya a ni Ranniel Semana iti nagun-odda a pammadayaw iti kaleppas a 2024 Sinag Maynila Independent Film Festival .
Kasaruno ti pammabigbig a naala ti inaramidda a pabuya a napauloan iti “INO” kas “Best Documentary.”
Dumanon laeng iti 24 nga official entries ti karaman iti 2024 Sinag Maynila Independent Film Festival pakairamanan iti 10 a shorts, 7 a documentary, ken 7 full-length features.
Iti interview ti Bombo Radyo, kinunana a balligi ti pannakagun-odda ti nasao a pammadayaw gaputa naipaayanna iti timek ti biag ni Ino.
“Ang pakiramdam ko ay isang tagumpay, ito ay ang tagumpay na mabigyan ng boses ang buhay ni INO at sa mga batang tulad niyang nakakaranas nito.”
“Mahalaga na mapansin ang mga ganitong issue ng lipunan, kailangan na maipaglaban ang karapatan ng bawat batang Pilipino na nakakaranas ng ganitong pangyayari. Ako din ay naninindigan na wala akong ginagawang mali. Sino ang gagalaw para sa kanila? Saan sila hahantong kung hahayaan nalang ang mga ganitong pangyayari?”
RANNIEL SEMANA, DIRECTOR AND PRODUCER OF INO
Ti Ino ket pakaistoryaan ti biag ni Santino, maysa nga ubing a nasapa a nariing iti panagtrabaho babaen iti panaglako ti balut idiay siudad ti Cauayan tunggal rabii.
Iti social media account ni Semana, impeksana dagiti nagdalananda sakbay a mabukel ti INO.
Sigun kenkuana, nasakit man nga ibutaktak ti kinapudno, kasapulan nga aramidenna ti nasao a pabuya gaputa kayatna nga ilaban ti karbengan para iti nasayaat nga edukasion.
Para kenkuana, ti tunggal ubing ket karbenganna iti nasayaat a masakbayan, ken patienna a ti edukasion ket tulbek tapno magun-od ti arapaap.
Sigun pay kenni Semana, ti edukasion ti rumbeng a maamuan dagiti ubbing, saan a ti nasapa a responsibilidad a naipabaklay kadakuada.
Kabayatanna, pinagyamanan ni Semana dagiti amin a timmulong tapno mabukel a napintas ti pabuya nga INO pakairamanan ti Montañosa Film Festival, dagiti direktor, mentor ken production team daytoy.
Maipalagip nga iti exclusive interview ti Bombo Radyo Baguio iti programa a Good Morning Philippines, kinuna ni Ranniel Semana a nagserbi nga inspirasionna dagiti pannubok ti biag tapno magun-od dagiti arapaapna nga agbalin a direktor ken producer ti pabuya iti baet a broken family daytoy.
Iti laeng nasapsapa a bulan iti agdama a tawen, nakagun-od metlaeng ti inaramidda a pabuya nga Ino kas Best Film Festival, Gold Documentary Award ken Grand Winner Award iti naipatungpal a Montañosa Film Festival 2024.
