Madanagan ti Department of Health (DOH) iti umad-adu a kaso ti chronic kidney disease (CKD) iti Pilipinas, pakairamanan dagiti ubbing.
Gapu iti dayta, kidkiddawen ti nasao nga ahensia a mapapigsa ti programa a primary care ken prevention iti intero a pagilian.
Sigun kenni DOH Secretary Teodoro Herbosa, nasayaat gaputa naimatangan ni President Ferdinand Marcos Jr. nga adda ti ubing iti dialysis center idi nagpasiar daytoy a rason ti panangibilinna a mapasayaat ti chronic kidney disease prevention program tapno marisut ti kangrunaan a rason ti nasao a sakit a kas ti diabetes ken hypertension.
Dinakamatna pay ti panagbalbaliw ti estilo iti panagbiag, nangruna kadagiti agtutubo.
Impaganetget ni Herbosa a ti panangparegta kadagiti makapasalun-at a “habits” ket ad-adda nga epektibo iti nabaybayag a panawen.
Kabayatanna, impakaamo ni PhilHealth president ken Chief Executive Committee Dr. Edwin Mercado a nangilatang ti nasao nga ahensia iti agarup 300 bilion para iti total benefit packages ti tawen 2025, pakairamanan iti para ti kidney transplant patients ken dialysis services.
