Nangipatungpal ti strike wenno panagatake ti Israel idiay Doha, Qatar idi laeng kalman partikular iti headquarters dagiti senior leaders iti militante a grupo ti Hamas a puntiryada a papatayen.
Sigun kadagiti Hamas babaen iti mapagtalkan a source, nakalasat dagiti top leaders daytoy bayat a lima met kadagiti opisyales a nababbaba ti posisyonna ket pimmusay.
Malaksid kadakuada, pimmusay metlaeng ti maysa kadagiti miembro iti Internal Security Force iti Qatar bayat nga adda pay dagiti daduma a nadangran sigun iti Interior Ministry ti nasao a pagilian.
Iti baet dayta, impatangken da Israeli Prime Minister Benjamin Netanyahu ken Defense Minister Israel Katz a ti panagatakeda ket nainkalintegan wenno completely justified mainaig iti October 7 massacre nga dagiti Hamas metlaeng ti nangirugi ken nangorganisa, kasta metten dagiti daduma pay a panagatake pakairamanan ti napasamak a pammaltog idiay Jerusalem itay laeng nabiit.
Kabayatanna, ti tignay ti Israel ket kinondenar iti Qatar a patienda a maysa a nalawag a panaglabsing iti international laws and norms kasta metten a maysa a seryoso a pangta iti security ken safety dagiti umili sadiay.
Malaksid iti Qatar, daduma pay a kabangibang a pagilian ti nangkondenar iti nasao a panagatake pakairamanan iti Saudi Arabia, United Arab Emirates,Iran,Egypt, kasta metten ni United Nations Secretary-General Antonio Guterres.
