Binallaagan ti Department of Health (DOH) dagiti doktor a mabalin a maikkat ti lisensiada, apaman a maduktalan nga inawatda ti regalo manipud kadagiti kompania ti agas, kas sukat ti panangiresetada ti partikular a brand kadagiti pasienteda.
Kasaruno daytoy iti naipablaak a marketing scheme dagiti sumagmamano a pharmaceutical companies a mangipapaay ti regalo, pakairamanan ti luxury cars kadagiti doktor.
Gapu iti dayta, indagadag ni Albert Domingo, Assistant Secretary ti Department of Health dagiti health professionals, a dagus nga ireportda ti nasao a marketing scheme iti Field Regulatory Operations Office ti Food and Drug Administration (FDA), a mangisaysayangkat iti imbestigasion mainaig iti nasao a kaso.
Nu paay kasta, patien ni Domingo nga adu paylaeng a doktor ti agtalinaed a napudno iti pagrebbenganda.
