Nagtinnulong ti Department of Labor and Employment (DOLE) ken Department of Agriculture (DA) tapno mapapartak ti pannakapalawa ti programa ti Kadiwa ng Pangulo (KNP) iti intero a pagilian.
Pormal ti panagkadua dagitoy itay laeng kanikadua babaen ti memorandum of understanding (MOU) a mangipatungpal iti KNP ken ti Integrated Livelihood Program (DILP) ti DOLE.
Impaganetget ni DOLE Secretary Bienvenido Laguesma a ti kangrunaan a prioridad ket ti panangipasdek kadagiti pagtagilakuan ti Kadiwa kadagiti lugar nga addaan iti dakkel a populasion dagiti mangmangged.
Ti programa ti Kadiwa ng Pangulo, partikular ti programana a Rice-for-All ken P29, ket mangipaay kadagiti Pilipino iti pannakagun-od iti makabael a bagas ken dadduma pay a tagilako iti agrikultura, kas iti nateng, karne, ken ikan.
Ti panagkadua ti dua a nasao nga ahensia ket saan laeng a mangipaay iti kanayonan a manpower para iti operasion ti KNP no di ket mangikonektar pay kadagiti accredited suppliers ken farmer cooperatives kadagiti tiendaan ti Kadiwa.
Umawat met dagiti benepisiario iti teknikal a tulong, capacity-building support, ken ad-adda pay a pannakapalawa dagiti programa ti KNP ken DILP.
Puntiria ti DA a manglukat iti agarup 300 a sentro ti KNP inton 2025.
Panggep pay ti DA a mangipaay iti nalaklaka a bagas iti Kadiwa stalls inton Enero iti sumaruno a tawen, kasaruno ti panagballigi ti Rice-for-All program, a mangipapaay ti bagas nga aggatad ti P40 tunggal kilo.