Impalagip ti Department of Labor and Employment (DOLE) kadagiti employer a rumbeng a maipaay ti doble a sueldo dagiti mangmangged iti “public” ken “private” nga opisina inton Hunio 17 kas panangrambak dagiti muslim ti Eid’l Adha.
Iti labor advisory no.08,m series of 2024 a pinirmaan ni DOLE Undersecretary Carmela Torres, naikeddeng ti panagbayad iti tangdan para iti regular holiday.
Itay laeng nabiit, indeklara gamin ni President Ferdinand “Bongbong” Marcos Jr., babaen ti Proclamation 579, ti Hunio 17 kas regular holiday kas panag-obserbar ti Eid’l Adha.
Iti kaudian a labor advisory, dagiti employer ket kasapulan nga agbayad ti pakabuklan a 200% ti tangdan dagiti empleado iti walo nga oras a panagtiggedda.
Kabayatanna, dagiti met saan a nagtigged nga empleado ket bayadan latta dagiti employer ti 100% ti tangdan dagiti empleado para iti naituding nga aldaw la ketdi mangipaay daytoy ti “employee report” wenno “leave of absence of pay”.
Dagiti empleado a nangipaay ti “overtime work” wenno sobra iti walo nga oras, kasapulan a maipaayan ti kanayunan a 30% iti tunggal oras a rate dagitoy.
Maipalagip a ti Eid’l Adha ket maysa kadagiti dua a napateg a “holiday” iti Muslim calendar nu sadinno, ti maysa ket Eid’l Fitr a mangmarka ti panagleppas ti nasantuan a bulan ti “fasting” iti Ramadan.
Bayat ti Eid’l Adha, dagiti Muslims ket mangparti ti karnero, kalding, baka, ken kamelio a panglaglagip iti kinatulok ni Propeta Ibrahim a mangidaton iti anakna iti bilin ni Allah.
