Inaklon iti Department of Public Works and Highways nga adda dagiti maaw-awagan a ghost flood control projects kas nakumpirmar kabayatan iti naangay a panagdengngeg idi laeng kalman.
Sigun kenni DPWH Secretary Manuel Bonoan, naduktalanna laeng ti maipapan kadagiti nasao a klase iti proyekto iti saan unay a nabayag nu saidno, iti agdama ket kinunana a nainget nga iberberipikardan dagitoy.
Nagkari metlaeng daytoy nga imbestigaranda dagiti naanomalya a proyekto.
Maipalagip nga immunan nga inwaragawag ni President Ferdinand Marcos Jr. ti naalana a listaan manipod iti Department of Public Works and Highways maipapan kadagiti kontraktor a maatap a nagnumar iti binilbilyon a gatad a nailatang koma para kadagiti flood control projects pakairamanan iti Legacy Construction Corporation, Alpha & Omega Gen. Contractor & Development Corp., St. Timothy Construction Corporation, QM Builders, EGB Construction Corporation, Topnotch Catalyst Builders Inc., Centerways Construction and Development Inc., Sunwest, Inc., Hi-Tone Construction & Development Corp., Triple 8 Construction & Supply, Inc., Royal Crown Monarch Construction & Supplies Corp., Wawao Builders, MG Samidan Construction, L.R. Tiqui Builders, Inc., ken ti Road Edge Trading & Development Services.
Kadagiti kinse a kontraktor a naimbitaran iti panagdengngeg iti Senate Blue Ribbon Committee, pito laeng ti nangipatulod iti panakabagi wenno representative, dagiti daduma ket addaan iti prior engagement, bayat a dagiti daduma ket saan a nangipaay iti sungbat.
Gapu iti dayta, naisingasing ken napatgan ti panakaipaay iti subpoena para iti idadar-ay dagitoy iti sumaruno a panangdengngeg.
Nagpangta met ni Senador Erwin Tulfo a ma-cite in contempt dagiti kontraktor nga agtultuloy a mangliklik ken saan nga umatendar iti Senate Blue Ribbon Committee hearing.
