BAGUIO CITY–Pagan-annaden ti Department of Public Works and Highways (DPWH) – Cordillera ti publiko manipud kadagiti agpampammarang nga empleyado ti nasao nga opisina nga agkidkiddaw ti kwarta wenno pabor.
Nailanad iti pakdaar iti publiko a pinirmaan ni DPWH-Cordillera OIC-Regional Director Khadaffy Tanggol a naka-awat ti opisinana iti sumagmamano a report nga adda ti maysa a grupo dagiti indibidual nga agkidkiddaw ti kwarta wenno pabor ken ar-aramaten dagitoy ti naganna.
Kinunana a ti modus dagiti nasao nga indibidual ket babaen iti solicitation.
Impettengna nga awan ti asinoman nga impaayanna iti pammalubos wenno otorisasyon para iti nasao nga aramid ken saanna a pulos nga aramiden ti nasao a banag.
Kagiddan iti daytoy ti panangiyapelana iti dagus a panangireport ti publiko iti opisinada no adda dagiti maengkwentro dagitoy iti nasao a modus.
