BAGUIO CITY – Pinatgan ni Department of Public Works and Highway (DPWH) Sec. Vince Dizon ti kiddaw ni Baguio City Congressman Mauricio Domogan a mabaliwan ti Construction Materials Price Data (CMPD) a basaran ti presyo dagiti materiales kadagiti infrastructure projects ti gobyerno, tapno maipada daytoy iti aktual a presyo dagiti materiales kadagiti hardwares iti siyudad.
Sigun kenni Cong. Domogan, positibo ti sungbat kenkuana ni DPWH Sec. Dizon idi sinaludsodna daytoy maipapan iti CMPD kabayatan ti panagserbina kas kangrunaan a sangaili iti naglabas a Panagbenga Grand Street Dance parade idi napan a lawas.
Kinunana a dinakamat kenkuana ni Dizon nga imbilinnan a maipangato ti naituding a CMPD babaen iti panakainayon ditoy ti gatad ti “hauling” ken “handling”.
Immuna iti daytoy, nangipatulod iti surat ken canvass ti kongresista ken dadduma pay nga lokal nga opisyal iti DPWH tapno kiddawenda a marepaso ti CMPD tapno maipada daytoy iti aktual a presyo datgiti construction materials iti siyudad.
Naduktalanda gamin a nababa ti intuding ti DPWH a CMPD no idilig iti agdama a presyo dagiti construction materials iti lokalidad.
Kinunana ni Domogan a saan nga nasayaat daytoy agsipud ta posible nga maupay dagiti kontraktor a makipaset iti “bidding” kadagiti proyekto ti gobyerno.
Inaayonna nga no adda man ti mang-bid kadagiti proyekto ket posible nga agresulta laeng daytoy iti nababa a kualidad ti proyekto.
Sigun kenkuana, nakarkaru ti epekto ti under estimated projects no idilig iti over estimated projects.
Gapu iti daytoy, naragsakan ti opisyal idi naammuanna a binaliwan ti DPWH ti intuding daytoy a CMPD.
Nupay kasta, agdanag ti opisyal a makaapektar kadagiti agdama a proyekto ti gobyerno ti panagngato ti presyo dagiti produkto a petrolyo gapuanan ti tensiyon sadiay Middle East.
Sigun kenkuana, posible a ngumato ti presyo dagiti construction materials a mangitunda iti panakaitantan dagiti proyekto, nangruna ta saan a kaskarina ti proseso ti price escalation kadagiti national government projects.//ASP
