Immanamong ni Department of Public Works and Highways (DPWH) Secretary Vince Dizon iti kinuna ni Ombudsman Jesus Crispin Remulla a napaay ti ahensia a mangipaay iti de kalidad nga imprastruktura, rason a pilpilien dagiti dadduma ti Public-Private Partnerships (PPP) para kadagiti dadakkel a proyekto ti gobierno.
Sigun kenni Remulla, nalawag ti kinakurang ti DPWH iti kalidad dagiti sumagmaano a proyekto, pakairamanan ti P9 Billion nga UP-PGH Cancer Center, baru a pasdek ti Bureau of Immigration (BI) building, ken ti National Bureau of Investigation (NBI) headquarters.
Immanamong met ditoy ni DPWH Secretary Dizon ken intudona ti internal systems ti DPWH a nagrugian ti parikut.
Sigun kenni Dizon, maysa daytoy kadagiti nabayag a mangitantandudo iti PPPs gapu iti timeliness, high quality ken cost efficiency dagiti proyekto.
Kabayatanna, impasigurado ti opisial a suportaranna dagiti singasing ni Remulla ken makitinnulong iti Ombudsman tapno isakadda ti reporma iti DPWH.