BAGUIO CITY-Umap-apela ti maysa a Cordillera artist iti suporta ti gobierno para kadagiti kas kenkuana a naissem iti arts ngem limitado laeng ti kabaelanna no maipapan iti pinansial.
Kidkiddawen ti 28-anyos a ni Donna Sagudang a maysa a Domestic Helper sadiay Hong Kong a maaddaan koma iti programa wenno scholarship ti gobierno para kadagiti amateur artist tapno matulungan dagitoy a mang-asa kadagiti talentoda a mabalin a makaipaay iti pammadayaw iti pagilian.
Iti eksklusibo a pannakipatang ti Bombo Radyo Baguio, kinuna ni Sagudang a sakbay a nabigbig daytoy kas nalaing a painter sadiay Hong Kong ket arigna awan ti nangikankano kadagiti drawing daytoy idi adda pay laeng daytoy ditoy Pilipinas.
Inyestoriana a saan met laeng daytoy a nakapaspaset kadagiti painting ken drawing contest idi agad-adal pay laeng daytoy gapu iti kinarigat ti panagbiag ti pamiliana ken awan man laeng ti maigatangna iti napintas a lapis.
Dinakamatna nga inan-anusanna ti daan ken marunrunoten a lapis tapno laeng adda ti aramatenna nga ag-drawing.
Kinunana a nagustuan ti amona ti panangpintorna iti nagduduma a disenio iti hardin ken balay daytoy.
Sigun pay ken ni Sagudang, sipud idi napinturan ti hardin ket balay ti amona ket kanayunen nga aw-awisen ti amona dagiti gagayyem daytoy nga agturongda iti balayna ken ipampannakkelna dagiti paintings daytoy.
Kinunana a nagbalin daytoy nga addang tapno in-inot a mabigbig ti abilidadna ken kalpasanna ket naitampok daytoy kadagiti nalalatak a news media agency iti uneg ken ruar ti Pilipinas.
Kinunana a maysa daytoy a pammaneknek a dagiti kas kenkuana a domestic helper ket addaan met iti talento a maipannakkel isut gapuna a saan a rumbeng a matagtagibassit dagitoy.
Sigun iti Pinay-painter, dakkel ti maitultulong kenkuana ti panagbalinna a miembro ti Guild for Upholding and Harnessing Indispensable Talents (GUHIT) Pinas ken adu dagiti tumultulong ken mangsupsuporta kenkuana tapno maituloyna ti panagpinta ken panag-drawing daytoy.
Maysa kadagiti masterpiece ni Sagudang ti panangi-drawing na kenni Miss Universe 2015 Pia Alonzo Wurtzbach ken mangnamnama daytoy a makita ti beauty queen ti arts daytoy.
Ni Sagudang a tubo ti probinsia ti Abra ket madama nga agbakbakasion ditoy siudad ti Baguio ken agsubi daytoy sadiay Hong Kong kalpasan ti dua a bulan tapno ituloyna ti biagna kas maysa a domestic helper.
