Nakemmeg ti maysa a lalaki, agtawen iti 36, awanan trabaho ken agdama a residente ti Lower Q.M., Baguio City kalpasan a nakitaan daytoy ti maatap nga ilegal a droga iti beltbag nga imet daytoy.
Maibasar iti report ti kapulisan, manarimaan ti pannangipatungpal dagitoy ti routine checkpoint idi pinarada ti motor a Honda Click nga imanmaneho ti suspek, pasado alas kwatro ti agsapa ita nga aldaw, September 8,.2026.
Ti checkpoint ket naipatungpal idiay Bonifacio Street, Baguio City babaen ti Baguio City Police Office Station 7.
Kas kadawyan a mapaspasamak tunggal checkpoint, sinaludsodda ti suspek panggep ti drivers license ken Official Receipt ken Certificate of Registration (OR/CR) ti motor daytoy. Nupay kasta, awan ti maiparang ti suspek kadagiti nadakamat a dokumento.
Bayat nga iberberipikar dagiti otoridad ti identity ken personal circumstances ti suspek, naobserbaran dagitoy ti kaadda ti cash iti beltbag daytoy.
Apaman a saludsuden pay dagiti kapulisan ti karga ti bag daytoy, kellaat lattan nga inabandonana ti suspek ti motor na ken timmaray.
Gapu ti dayta, kinamat met daytoy ti kapulisan.
Apaman a nakamatda ti suspek, kiniddaw dagiti otoridad a lukatanna ti beltbagna tapnu macheck.
Boluntaryo met a nilukatan ti suspek ti betlbagna ket dita a nadiskubre dagiti kapulisan ti lima a piraso ti heat-sealed transparent plastic sachets a naglaon ti maatap a shabu.
Dita metten a pinosasanda ti suspek.
Dumanon ti agarup 10.1 a gramo ti maatap a shabu ti nakumpiska manipud kenkauna no sadino addaan daytoy iti gatad nga agarup PhP 68,700.00.
Nakumpiska metlaeng ti dua a selpon; cash a dumanon ti PHP72, 583.25; beltbag; motor; ken maysa a pouch manipud iti suspek.
Sumango met daytoy iti kaso a panglabsing ti Section 11, Article II of RA 9165 ken applicable provisions ti Republic Act 4136 wenno Land Transportation and Traffic Code seknan iti vehicle registration, drivers licensing, traffic rules and speed limts ken vehicle specifications and loads.
Iti agdama, adda metten iti kustodiya ti kapulisan ti suspek pakairamanan dagiti nakumpiska nga ebidensya para ti umno a dokumentasyon ken inquest proceedings.
Ti maatap nga illegal droga ket maipasidung met ti umno a forensic unit para ti qualitative and quantitative examination.
Iti sabali a bangir, iti pannakiuman ti Bombo Newsteam iti suspek, inaklon daytoy nga ammona nga adda iti maatap a shabu nga imetna rason tapnu tumaray ngem pinaglibakanna a personal a tagikuana ti maatap nga illegal a droga.
