Nakaruaren manipod iti detention facility ti driver iti naidungpar nga Sports Utility Vehicle idi May 4 idiay Ninoy Aquino International Airport Terminal 1 kalpasan a nakapagpiansa daytoy.
Ti panakawaya-waya ti agtawen iti 47 a driver ket kinumpirmar ni Manila International Airport Authority General Manager Eric Ines ken ti Philippine National Police Aviation Security Group.
Ti nasao a driver ket inrekomendaran iti Pasay City Regional Trial Court iti piansa a P100,000 para iti panakawaya-wayana.
Sumangsango ti driver iti kaso a reckless imprudence resulting in double homicide, multiple serious physical injuries ken damage to property.
Maipalagip a pimmusay ti dua nga indibidwal gapu iti nasao nga aksidente pakairamanan iti maysa nga agtawen iti 4 a babae nga ubing ken ti maysa pay nga agtawen met iti 29.
Immuna metten a rimwar iti otopsiya dagitoy a blunt force trauma ti gapuanan iti ipupusayda.
Kabayatanna, agtultuloy met ti panangipukkaw iti hustisya ti ama ti pimmusay nga ubing.