BAGUIO CITY – Agtultuloy ti search and retrieval operation dagiti otoridad tapnu mabirukan ti driver a naiyanod iti napegges a danum iti kanal sadiay Marcos Highway iti paset ti Lower Dontogan, Baguio City idi rabii ti Sabado, August 11.
Nabigbig daytoy a ni Mencio Abol Amitem, 57-anyos, naasawaan, driver ken residente ti Pula, Poblacion, Tuba, Benguet.
Maibasar iti report, adda ti iggem ti biktima a maysa a cartoon ti groserya ken bayat a magmagna iti footbridge tapnu itulodna daytoy iti paglakuan dagiti kakaduana idi aksidente a napukawan ti balanse ken natnag iti kanal.
Naiyanod daytoy gapu iti napigsa nga agos ti danum paturong iti Badiwan River sadiay Tuba, Benguet.
Naamuan nga iti baet ti dua nga aldaw nga operasyon ket saan paylaeng a nabirukan ti bagi ti biktima.
