BAGUIO CITY – Natiliw ti maysa a driver kalpasan a naduktalan ti iligal a panangiserrekna kadagiti pasaherona ditoy siudad ti Baguio idi rabii.
Nabigbig daytoy a ni Orlie Manaog Dizon, 42-anyos, residente ti Don Fabian Barangay, Commonwealth, Quezon City.
Maibasar iti report, pinara dagiti pulis nga agbambantay iti Marcos Highway Quarantine Checkpoint ti maysa nga innova nga agmaris ti silver ken pinapanda iti triage sadiay para iti panakasukimat dagiti dokumento dagiti pasahero sakbayda a mapalubosan a makastrek iti siudad.
Kabayatan ti panangkwestionar dagiti pulis kenni Dizon ket napaay daytoy a mangipakita iti prangkisana para iti panangibiahena kadagiti pasahero daytoy.
Imbaga pay ni Dizon a naggapu daytoy ken ti innem a pasaherona sadiay Tarlac manipud iti dinar-ayanda a birthday party.
Nupay kasta, iti panangkwestionar dagiti pulis kadagiti pasahero ket inaklon dagitoy a nagtaudda iti nagduduma a lugar kas iti NAIA, Quezon City ken Batangas ken nagkolektar ni Dizon iti sag-P1,500.
Gapu iti daytoy, naipaima ni Dizon iti pulisya ken iti panakaipila ti kaso iti korte ket naibilin laeng ti panakaited ti ticket kenkuana.
