Napilaanen iti kaso a Reckless Imprudence Resulting in Homicide ti maysa a driver ti jeep a nakadungpar iti 28-anyos a rider idiay Harrison Road, Baguio City itay laeng kanikadua.
Iti pannakiuman ti Bombo Radyo kenni PMaj. Marcy Grace Marron, Public Information Officer ti Baguio City Police Office, kinunana a naipasidong iti inquest proceeding ti nasao a driver a nakabangga ken nakaatal iti biktima.
Sigun kenkuana, adda itan iti ikot dagiti otoridad ti nasao a driver ken maur-uray laengen ti commitment order tapno maiyakar daytoy iti Bureau of Jail Management and Penology ngem kinunana a nabiit laeng ti pananguray iti commitment.
Maipalagip a pimmusay ti 28-anyos a lalaki nga addaan iti pamilya ken annak a maysa a porter iti Baguio Public Market kalpasan a naatalan.
Iti immuna a pannakiuman ti Bombo Radyo kenni Eloiza Ruiz, nanang ti biktima, kinuna a paawid kuman ti anakna iti dayta a gundaway nga adaan iti imet a pasalubung para ti pamilyana idi napasamak ti aksidente.
Inladawan ti nanangna a nasingpet, nagaget ken daytoy laeng ti agtrabtrabaho para ti pamilyana rason a nasakit ken nadagsen ti rikna dagiti napanawan a pamilya ti biktima.
Impettengda a nasken a maipaayan iti hustisya ti napasamak ti anakna.
Iti agdama, agtultuloy ti imbestigasion dagiti kameng ti Baguio City Police Office iti nasao nga insidente tapno makaalada pay iti kanayunan nga impormasyon.
Impetteng ni PMaj. Marron, nga awan pay ti iggem dagitoy a kopya ti video wenno dashcam maipapan ti napasamak nga insidente.
Gapu ti dayta, umap-apela dagiti otoridad nangruna kadagiti imbestigador iti publiko a nakaala iti video iti napasamak nga insidente a makitinnulong dagitoy iti kaso.
Kabayatanna, inlawlawag ti nasao nga opisina iti publiko a saan a naladaw ken nabayagan dagiti kameng ti pulisya a nagresponde iti nasao nga insidente.
Kasaruno ti “misunderstanding” a napasamak iti social media nu sadinno, sumagmamano kadagiti netizens ti mangibagbaga a nabayagan dagiti kameng ti Baguio City Police Office a nagresponde.
Ngem sigun iti Baguio City Police Office, adda dagiti proseso ken sumagmmamano a rumbeng a maikonsidera ken maaramid sakbay a magaraw ti bangkay ti biktima gaputa saan a kaskarina a magaraw daytoy.| via Bombo Noveh Organo
