BAGUIO CITY – Nakaruaren manipud iti ospital ti maysa kadagiti tallo nga indibidual a nakaro a nadangran iti panakatnag ti naglugananda a ford fiera iti rangkis iti deppaar ti Halsema Highway partikular sadiay Gambang, Bakun, Benguet idi rabii ti Martes, September 3.
Immunan a nabigbig dagiti biktima a da Markly Bantian, 27-anyos, driver ti nasao a lugan; Emerson Bao-idan, 30-anyos, ken ni Edgar Kitongan, 40-anyos, bin-ig a mannalon ken residente ti Amgaleyguey, Buguias, Benguet.
Sigun iti pulisya, nakaruaren iti pagagasan ni Bantian iti agsapa idi kalman bayat nga agtaltalinaed a naka-confine da Bao-idan ken Kitongan nga agpada nga addan iti natalged a kondisyon.
Naamuan iti imbestigasyon ti Buguias PNP a nagtaud dagiti biktima sadiay Abatan, Buguias ken paawiden dagitoy ngem bayat ti panagdalyasatda iti nasao a paset ti kalsada ket naaddaan iti electrical defect ti lugan a nagresulta tapnu maiddep ti head light daytoy.
Gapu iti daytoy, saanen a nasurutan ni Bantian ti umno a direksyon ti kalsada agingga a natnagda iti rangkis nga addaan kauneg nga agarup 100 a metro.
Naispal dagiti biktima babaen kadagiti nagresponde a kameng ti Buguias PNP ken Buguias Municipal DRRM Council ken ita ket agpapaimbagda iti Luis Hora Regional Hospital sadiay Bauko, Mountain Province.
