Nakaconfine iti ospital ti driver ti maysa a motorsiklo kalpasan a nagbinangga dagitoy iti maysa a jeep iti Loakan road, Baguio City ita nga aldaw.
Iti panakiuman ti Bombo Radyo kenni Police Corporal Jeovanie Bania-ao, traffic investigator ti Traffic enforcement unit-Baguio, kinunana a napasamak ti insidente iti 9:15 A.M. ken daytoy ket impakaamo ti Baguio City Police Office Station 4 kadakuada.
Dagus met a nagresponde dagitoy ken kas maibasar iti dashcam ti motorista, nakita a daytoy ti nag-overtake iti paset a kurbaan ti Loakan road a nangitunda iti aksidente.
Sigun kenni PCpl. Bania-ao, ti jeep ket nagtaud manipud Central Business District ken paturong Loakan bayat a ti motorista ket iti sabali a linya.
Innayon ni PCpl. Bania-ao, nawaya-wayaan ti drayber ti jeepney gapu ta awan pay ti naipila a kaso kontra kenkuana.
