Pimmusay ti maysa a truck driver bayat a nadangran dagiti dua a kakaduana kalpasan a natnag ti imanmaneho daytoy a truck iti rangkis iti nagbaetan ti Upper Cotcot, Bangao, Buguias, Benguet ken Mountain Province ita nga aldaw.
Nabigbig ti driver a ni Denver Adcapan, 33-anyos, naasawaan ken residente idiay Guinzadan, Bauko, Mountain Province.
Iti pannakiuman ti Bombo Radyo kenni Police Senior Master Sergeant Crisencio Kebasen ti Buguias Municipal Police Station, kinunana a napasamak ti nasao nga aksidente iti oras ti alas kwatro y media ti malem ngem naala laeng ti bangkay ti driver iti oras ti alas otso y media idi tattay.
Sigun kenni Kibasen, napasamak ti aksidente gapu iti mechanical defect ti nasao a lugan.
Dagus metlaeng a nagresponde dagiti pulis manipud iti Buguias Municipal Police Station kalpasan a nakitada ti nasao nga insidente rason a naitaray a dagus dagiti dua a pasaheros iti Lutheran Hospital idiay Abatan, Buguias, Benguet.
Nupay kasta, saan a naispal ti driver agsipud ta naipit daytoy rason a narigatan dagiti rescuers a nagresponde.
Nakitinnulong met ditoy dagiti otoridad manipud iti Municipal Disaster Risk Reduction and Management Office-Buguias, Rural Health Unit-Buguias, Bureau of Fire Protection-Bauko, Bauko Municipal Police Station ken dadduma pay.
Innayon metlaeng ni Kibasen a saan paylaeng a naguyod ti nasao a truck iti nakatnaganna a rangkis agsipud ta rabii ken marigatan dagitoy.
Iti agdama, naiyawiden ti bangkay ti nasao a driver, bayat nga addan metten iti nasayaat a kasasaad dagiti dua a kakaduana.
