BAGUIO CITY- Naipilan ti kaso a reckless imprudence resulting to homicide iti driber a nakadungpar ken nakaatal iti maysa a babai sadiay Suello Village ditoy siudad ti Baguio idi kanikadwa.
Immunan a nabigbig ti nasao a driber a ni Marcelino Baldas, 24-anyos, awanan asawa ken residente ti Purok 3, Gibraltar, Baguio City.
Kabayatanna, naamuan nga iti agdama ket ada pay laeng iti punerarya sadiay Marcos Highway ti biktima a ni Amanda Moreno, 27-anyos ken residente ti Purok 3, Dontogan, Baguio City.
Manamnama met a maiyawid daytoy sadiay Makati City inton bigat aldaw ti Lunes para iti panakaitabon daytoy.
Maipalagip nga immunan a kinuna ni PSIns. Eliezer Brioso De Vera, dadaulo ti BCPO Station 10 a madama ti panagballasiw ti biktima iti pedestrian lane idi nadungpar ken atalan ti truck.
Kinunana a ti truck ket kargado iti darat ken paturong kuma daytoy iti lowland.
Dinakamatna a saan a nabartek ti driber ngem kas maibasar iti salaysay daytoy ket saanna a nasiputan nga agballasiw gayam ti nasao a babai.
