Baguio City — Umap-apela ita iti tulong ti driver ti maysa a van a hinarang ken dinangran ti grupo dagiti riders iti Ambuklao Road, sadiay Banao, Bokod Bennguet idi Disyembre 7, 2024, a nagviral iti social media.
Iti panakiuman ti Bombo Radyo kenni Daniel Saturnino, driver ti van, kinuna nga napasamak ti nasao nga insidente idi pinilit dagiti nasao a riders nga overtaken ti iman-manehona a van iti alanganen ken kurbada a paset ti kalsada.
Kinunana nga nag-menor daytoy tapno makapag-overtake dagiti riders ngem imbes nga ituloy dagitoy nga ag-overtake ket nakaungetda isut gapuna a hinarangan ken pinasardengda ti van daytoy.
Dinakamatna a kasla kayat dagiti riders nga naan-anay nga isardengna ti luganna tapno laeng nawaya a makapag-overtake dagiti riders.
Sigun kenni Daniel, maysa kadagiti rider ti immasideg iti right side window bayat a ti maysa pay ket iti driver’s side.
Innayonna a kinaritda isuna a bumaba iti luganna tapno agdinnanog dagitoy, ken sinipat-sipat pay ti maysa kadagiti rider ti rupana bayat a nakatugaw daytoy iti uneg ti luganna.
Malaksid iti daytoy, dinadael pay ti maysa a rider ti side mirror ti luganna.
Kinunana pay a napabutngan unay daytoy agsipud ta ti maysa kadagiti riders ket kasla adda as-asutenna nga igam iti bagna.
Impapan ni Daniel a talaga a panggep isuna a patayen dagiti riders isu’t gapuna a dagus a linuktanna ti ruangan ti luganna ken daras a timmaray a rimmuar agingga iti karayan.
Nagdardaras met a pimmanaw dagiti innem a riders idi nakataray ni Daniel manipud iti luganna.
Sigun kenkuana, nagsubli laeng daytoy iti luganna ken intuloyna a nangibiahe kadagiti tallo a pasaherosna idi naammuanna a nakapanawen dagiti riders.
Agyamyaman met ti driver kadagiti am-ammona a nangi-video iti nasao nga insidente.
Sigun pay kenkuana, naireport metten iti Bokod Municipal Station ti nasao a pasamak ket am-ammuen ita dagiti pulis no naalaan iti CCTV footage dagiti nasao a riders idiay Junction-Gurel tapno maammuan ti plaka dagiti nasao a motorsiklo.
Gapu iti daytoy, umap-apela ni Daniel iti tulong ti publiko tapno mabigbig ti kinasiasino dagiti nasao a riders.//Bombo Alfred Pudsoc
