Impakaammo ti General Authority of Civil Aviation (GACA) a timmama ti maysa a drone strike idiay Kuwait International Airport a nangitunda iti pannakadangran kadagiti sumagmamano nga empleyado iti nasao nga eropuerto.
Malaksid iti dayta, nadadael metlaen ti passenger building wenno maysa a terminal ti nasao nga airport.
Sigun kenni Abdullah Al-Rajhi, pannakangiwat ti nasao nga ahensya, dagus a naipatungpal ti emergency procedures tapno ma-aksyonan a dagus ti nasao a pasamak.
Naipaayan metlaengen ti tulong medikal dagiti nadangran.
Sigun pay iti report, rinugianen ti technical team ti evaluation nu kasatno kalawa ti damage ti nasao a pasamak.
Impasigurado met ti GACA a kontroladon dagiti otoridad ti sitwasyon ken agtaltalinaed nga umuna a prayoridad da ti seguridad dagiti pasaeros ken empleyado ti nasao nga eropuerto.
Innayon ti nasao nga ahensiya a mangipaaydanto ti kanayunan nga impormasyon apaman a makumpirmar amin a detalye seknan iti nasao a pasamak. //BomboKCS
