BAGUIO CITY – Sumangsango iti kaso a panaglabsing iti RA 9165 wenno Comprehensive Dangerous Drugs Act of 2002 ti maysa a lalaki kalpasan a natiliw daytoy iti baet ti panaglibasna kabayatan ti buy-bust operation kontra kenkuana iti national highway sadiay Lucog, Tinglayan, Kalinga idi kanikadua, April 7.
Nabigbig daytoy a ni Ruben Appag, 30-anyos, residente ti Loccong, Tinglayan, Kalinga.
Maibasar iti report ti Kalinga PPO, nakadlaw ti suspek a pulis ti katransaksionna isut gapuna a timmaray daytoy ken limmagto iti rangkis.
Naibati na met ditoy ti dua a bag ken ti motorsiklona.
Kinamat daytoy dagiti pulis ken nasarakanda daytoy a nakaidda nga addaan dunor iti deppaar ti Chico River.
Dagus a naiturong daytoy iti pagagasan.
Nadiskobre met manipud kadagiti bag ti suspek ti 19 a pidaso ti marijuana bricks ken 4 a pidaso ti tubular marijuana nga addaan kadagsen amin a 23 a kilo nga aggatad ti P2.76-M.
