BAGUIO CITY – Nakemmeg ti maysa a drug personality a maibilbilang a high value individual (HVI) iti buy-bust operation nga insayangkat dagiti otoridad sadiay Tabbak, Bulalacao, Mankayan, Benguet idi kanikadua.
Nabigbig daytoy a ni Aizan Lammawin Galgaleng, 23-anyos, baro, mannalon ken residente ti Lower Bulalacao, Barangay Bulalacao, Mankayan, Benguet.
Nakumpiskar manipud kenkuana ti maysa a pakete ti mapapati a shabu nga agdagsen ti mapattapatta 0.13 grams ken ti cellphone ken motorsiklo a naaramat iti transaksion.
Narekober metlaeng manipud kenni Galgaleng ti naaramat a P1,000 a buy-bust money.
Nupay kasta, iti panangkapkap dagiti otoridad kenni Galgaleng ken ditoy a nadiskobre ken nakumpiskar iti ikotna ti kanayonan nga uppat a pakete ti mapapati a shabu nga agdagsen iti mapattapatta 0.40 grams.
Sumangsango itan ti nasao nga indibidual iti kaso a panaglabsing iti RA 9165 wenno ti Comprehensive Dangerous Drugs Act of 2002.
