BAGUIO CITY – Pimmusay ti maysa nga admin aide kalpasan a pinalpaltogan daytoy ti dua a saan pay a nabigbig a suspek iti sangwanan a mismo ti pagtatrabahuanna nga ospital sadiay Quirino, Luna, Apayao idi kanikadua.
Nabigbig daytoy a ni Ricky Novus Vicente, 38-anyos, naasawaan ken residente ti Balasi, Flora, Apayao.
Maibasar iti report, lukatan kuma ti biktima ti ridaw ti nakaparada a luganna iti sangwanan ti Far North Luzon General Hospital and Training Center idi killaat a dimteng ti dua a suspek a nakalugan iti motorsiklo.
Simmardeng dagiti suspek iti agarup nasurok 10 a metro manipud iti ayan ti biktima sakbay a bimmaba ti back rider ken inatiganna ti biktima.
Dagusna a pinalpaltogan ti biktima iti sumagmamano a daras sakbay a naglibasda iti kaduana paturong iti Brgy. San Isidro Sur, Luna.
Nagsagrap ti biktima iti siyam a tama ti bala ti paltog iti nagduduma a paset ti bagina bayat a nakarekober dagiti pulis iti lima a basyo ti bala ti caliber 45 iti crime scene.
Naamuan met a ti biktima ket karaman iti watch list ti Barangay Balasi kas maysa a drug user ken boluntaryo a simmuko idi December 2016.
Im-imbestigaran paylaeng ti Flora PNP ti motibo ti pammapatay.
