BAGUIO CITY – Pimmusay ti maysa a drug surrenderee kalpasan a napalpalatogan daytoy iti sangwanan ti maysa a videoke bar sadiay Motorpool, Buyagan, La Trinidad, Benguet idi rabii.
Nabigbig daytoy a ni Elvis Buclao Benito, 46-anyos, truck driver ken residente ti Upper Wangal, La Trinidad, Benguet.
Maibasar iti report, nag-inom iti arak ti biktima ken ti kadua daytoy iti pagtaenganda sakbay dagitoy a rimuar.
Kalpasan ti maysa nga oras, nakaawat iti tawag ti anak ti biktima a napaltogan ti amana.
Naitaray ti biktima iti pagagasan ngem pimmusay daytoy gapu iti adu a tama ti bala ti paltog.
Naamuan a nagsagrap ti biktima iti innem a tama ti bala ti paltog, partikular iti barukongna ken narekober manipud iti bagi daytoy ti dua a basyo ti caliber 45.
Narekober met iti nakapasamakan ti krimen ti innem a basyo ti bala ken dua a bala.
Naamuan pay a ti biktima ket drug surrenderee ti La Trinidad PNP.
