BAGUIO CITY — Natalgeden ti drug suspect a napaltugan kabayatan ti buy-bust operation kontra kenkuana sadiay Shontog Street, Rizal Monument, Baguio City idi kalman.
Nabigbig daytoy a ni Paul Onoza, 35-anyos, negosyante ken residente ti City Camp Proper, Baguio City.
Sigun kenni BCPO City Director PSSupt. Ramil Saculles, naipasidong ti nasao a suspek iti buy-bust operation babaen iti panangidaulo ti City Drug Enfrocement Unit ken ti PDEA – Cordillera.
Kinunana a kabayatan ti transaksyon, nakadlaw ti suspek a pulis ti kasarsaritana isut gapuna a ginandat daytoy ti aglibas babaen ti motorsiklo daytoy.
Binangga ti suspek ti pulis a nagpamarang a posuer-buyer isut gapuna a pinaltugan ti pulis ti pilid ti motorsiklo ngem natamaan met ti kanawan a saka ti suspek.
Naala manipod iti ikot ti suspek ti dua a sachet ti mapapati a shabu ken 13 a pidaso ti sag-P500 a boodle money.
