Pagdandanagan ti Drugstores Association of the Philippines (DSAP) ti singasing ti Department of Department of Trade and Industry (DTI) a mapalubusan dagiti sari-sari stores nga agilako iti over-the-counter (OTC) nga agas.
Sigun iti nasao nga asosasyon, posible a mangpataud daytoy iti adu a kaso ti mishandling ken saan nga umno a panagaramat kadagiti agas.
Impetteng ni Drugstores Association of the Philippines national President Maribel Rafael a kasapulan ti proper regulation, handling ken pharmaceutical oversight iti panagilako kadagiti agas tapno masigurado ti kinatalged ti publiko nga agaramat kadagitoy.
Innayon ni Rafael a namnamaenda nga adalen a nalaeng ti Food and Drug Administration (FDA) ken dadduma a maseknan nga ahensia ti nasao a singasing ti Department of Trade and Industry (DTI).
Maipalagip nga impakaammo ti Department of Trade and Industry, babaen iti social media dagitoy ti planoda a mangipalubos kadagiti sari-sari stores a mangilako kadagiti Over-the-counter nga agas.
Agraman ti kaaduan a bitamina ken supplements a saan a kasapulan ti reseta manipud iti doktor.
Nupay kasta, inlawlawag ti DTI nga awan pay ti pinal iti nasao a singasing, kalpasan a nakaawat daytoy iti pammabalaw manipud kadagiti pharmaceutical ken healthcare sectors iti pagilian.
