Agtultuloy a mangipapaay ti Department of Social Welfare and Development Field Office-Cordillera kadagiti apektado iti naglabas a bagyo ken napapigsa a habagat iti rehiyon.
Idiay Tublay, Benguet, nangipaay ti nasao nga opisina iti P10,000 a financial assistance iti maysa a pamilya a naawanan iti pagtaengan kalpasan a nadadael ti balay dagitoy gapu iti panagreggaay ti daga nga intunda iti agtultuloy a panagbayakabak iti tudo.
Kabayatanna, iti kaudian a datos ti nasao nga ahensya, adda pay laeng ti agarup 42 a pamilya nga ada kadagiti evacuation centers iti nagduduma a probinsya.
Iti agdama, dumanon metten iti 20 dagiti nailistada a totally damaged a pagtaengan bayat a 229 met ti partially damaged.
Dumanonen metten iti agarup P31.1 Milyon a gatad ti naipaay a humanitarian assistance iti rehiyon ken adda pay ti nakastandby a relief resources nga agatad iti P92.6 Milyon.
Mapaspasaran pay laeng ti agtultuloy a panagtudona isu’t gapunna a mannarimaan pay laeng ti pannakikoordinar ti DSWD-Cordillera kadagiti local government unit tapno maamuwan a dagos nu adda dagiti apektado a pamilya ken dagos a maipaayan dagitoy iti maiyanatup a tulong. //𝓴𝓬𝓼//