Agtaltalinaed a nakamonitor ti Department of Social Welfare and Development (DSWD) Field Office- Cordillera kadagiti internally displaced persons (IDPs) a mannarimaan nga agtaltalinaed kadagiti evacuation centers iti siudad partikular idiay Guisad Sur, Quezon Hill, San Luis, Lower Rock Quarry, ken Lourdes Dominican.
Sigun iti nasao nga ahensya, mannarimaan ti monitoring, validation , ken assessment tapno maamuwan ken maaddressan dagiti kangrunaan a kasapulan dagiti pamilya.
Malaksid iti dayta, mangipapaay metlaeng ti nasao nga ahensya iti psychosocial support para kadagiti indibidual a makapaspasar iti emotional distress gapu kadagiti pasamak nga intunda ti naglabas a bagyo ken napapigsa a habagat.
Kadua ti Baguio City Social Welfare and Development Office (CSWDO), bineripikar metlaeng ti nasao nga ahensya ti profile dagiti internally displaced persons (IDPs) tapno masigurado ti umno ken updated nga impormasyon dagiti biktima.
Agingga iti agdama, agtultuloy nga agbambantay ti DSWD-Cordillera kadagiti komunidad tapno masigurado ti dagos a pannakaipaay ti maiyanatup nga assistance iti kanito nga ada ti maapektaran nangnangruna iti agtultuloy a panagbayakabak iti tudo. //𝓴𝓬𝓼//