Mannarimaan paylaeng a nakamonitor ti Department of Social Welfare and Development Field Office-Cordillera (DSWD-CAR)kadagiti naapektaran iti naglabas a bagyo ken habagat iti rehiyon.
Nakikoordinarda metlaeng kadagiti concerned local government unit para iti pannakabigbig kadagiti kasapulan nga assistance para kadagiti apektado a pamilya ken komunidad.
Sigun iti kaudian a datos ti nasao nga ahensya, dumanonen iti P28 Milyon ti naipaay a humanitarian assistance iti rehiyon.
Innayon pay daytoy a dumanon iti 402 a barangay ti naapektaran iti rehiyon no sadino 48,023 ti apektado a pamilya.
Sigun pay iti nasao nga ahensya, agtaltalianed pay laeng ti agarup 40 a pamilya iti uneg ti evacuation center.
Dumanonen metten iti 19 a babbalay ti nailistada a totally damaged ken 225 met ti partially damaged.
Agtaltalianed met a nakabantay ti nasao nga ahensya tapno dagos a maipaay dagiti kangrunaan a tulong para kadagiti apektado nangnangruna ta agtultuloy pay laeng ti panagbayakabak iti tudo. //kcs//