Imbinglay ti Department of Trade and Industry Baguio-Benguet (DTI Baguio-Benguet) nga agtultuloy iti monitoringda kadagiti nagduduma nga establisiyemento iti Probinsya ti Benguet, nga agdama a naipasidung pay laeng iti State of Calamity.
Kagidan iti pannakaideklara iti State of Calamity ti price freeze no sadino maipawil ti mangipangato kadagiti presyo ti kangrunaan a gagatangen.
Iti pannakiuman ti Bombo Radyo kenni Ralph Altiyen, mangidadaulo iti Consumer Protection Division ti DTI Baguio-Benguet, imbinglayna a regular met ti ipatpatungpal dagitoy a monitoring kadagiti establisiyimento tapno siguradoenda nga agtungtungpal dagitoy iti price freeze no sadino impettengna a dakkel a katulonganda ditoy dagiti nagduduma a Negosyo Centers iti Probinsya.
Inlawlawag metlaeng ni Altiyen a ti saklaw ti nasao a price freeze ket dagiti supermarkets ken grocery stores, ken saan a dagiti babbasit a sari-sari stores ken independent online sellers.
Kasaruno daytoy iti panangawatda kadagiti sumagmamano a report manipud kadagiti konsyumer a pananglabsing dagiti stores. Nupay kasta, apaman a tiningitingda dagiti nasao a report, naduktalanda a sari-sari store ti dakdakamaten dagiti kostumer.
Innaklon met ni Altiyen nga apaman a naideklara ti State of Calamity, adda dagiti establisiyemento a nakitaanda a mangilaklako kadagiti kangrunaan a gagatangen iti nangatngato a presyo.
Nupay kasta, impetteng ti nasao nga opisyal a compliant met dagitoy apaman a bagaanda.
Impetteng met daytoy nga apaman a mai-lift ti pannakaideklara ti State of Calamity iti Probinsya ti Benguet, agsubli metten dagitoy iti monitoring babaen iti Suggested Retail Price dagiti gagatangen.
Imbinglayna met laeng nga iti agdama, umdas pay laeng dagiti suplay ti kangrunaan a gagatangen iti probinsya gapu iti agtultuloy a panagsangpet ti supply manipud idiay baba.
MAINAIG ITI DAYTA. .
Inlawlawag ni Ralph Altiyen, mangidadaulo iti Consumer Protection Division ti DTI Baguio-Benguet a saanda a basta lattan mangipaulog iti Notice of Violation kadagiti establisyimento a makitada nga aglabsing.
Sigun kenkuana, apaman a makaawatda iti report, ipaayanda pay nga umuna dagiti establisiyemento iti Letter of Inquiry tapno ilawlawagda ti bennegda. Apaman a naduktalan a naglabsing dagitoy, dituyda metten a mangipaay iti iti Notice of Violation ken sarunoen iti Issuance of Formal Charge no sadino mabalinda a mapatawan iti multa a dumanon iti P5,000 agingga P1 Million.
Iti baet dayta, kinomendaranda na met dagiti establisiyemento iti siudad ti Baguio ken Probinsya ti Benguet gapu ta saanda a nasukir, ammuda a maki negotiate ken compliant dagitoy. //kcs//
