BAGUIO CITY – Agtultuloy ti panangitandudo ti Department of Trade and Industry (DTI)-Cordillera iti industriya ti kape iti probinsiya ti Benguet, ti mabigbigbig a pagtataudan ti “Best Arabica Coffee in the North.”
Iti exclusive interview ti Bombo Radyo kenni Juliet Lucas, Regional Director ti Department of Trade and Industry – Cordillera, kinunana a dakkel ti akem ti kape gapu ta maibilang daytoy kas maysa kadagiti kapatgan a commodity.
Sigun kenni Lucas, supsuportaranda ti industriya ti kape no sadino mangipatpatungpal dagitoy ti training maipapan iti nagduduma a proseso ti kape, ti panangital-o iti produkto, ken ti panangipasigurado a dagiti kape a maap-apit iti rehiyon ket de-kalidad.
Iti panagbalin kas maysa a coffee industry ti maysa a lugar a kas iti La Trinidad, mabalin met daytoy nga agbalin kas tourist destination nangruna no nagbloom dagiti kayo ti kape ken no panag-aapit gapu ta mabalin nga agserbi daytoy kas maysa nga experience kadagiti turista.
Saan met a mailibak a ti rehiyon Cordillera ket maysa a “place of coffee” gapu iti napintas a terrain, scenery ken klima daytoy.
Maipalagip a naisayangkat ti Coffee and Cacao Appreciation and Education iti manarimaan a selebrasyon ti Coffee Festival sadiay La Trinidad, Benguet.
Gapu iti dayta, maal-allukoy dagiti amin a coffee business a makipaset kadagiti nagduduma a pasalip bayat a maal-allukoy met dagiti coffee lovers nga agturong sadiay ken gumatang kadagiti nagduduma a klase ti kape.
Kabayatanna, tumultulong ti Department of Trade and Industry – Cordillera iti panangipasigurado nga authentic ken de-kalidad dagiti maap-apit a kape iti rehiyon tapno adda a mabalin a makastrek daytoy iti industriya ti sabali a pagilian.
Manamnama met a maipatungpal ti Philippine Coffee Expo inton Hunyo 7 agingga Hunyo 9 sadiay Manila.//Bombo Mera Pacpacan
