Maatap a hinarang ken kinemmeg ti Iran ti dua a barko nga agdaldayasat iti Strait of Hormuz idi kalman sigun iti report.
Sigun iti nasao a report, insayangkat ti Islamic Revolutionary Guards Corps ti panangharang iti dua a barko gapu iti maatap a maritime violations.
Daytoy ti ummuna a report ti aktwal a panangarestar iti maysa a barko iti Hormuz manipud idi ngimmato ti tensyon idiay Middle East.
Kagiddan dayta, impakaammo ti maysa a British maritime security a tallo a barko ti tinamaan ti bala ti paltog iti met laeng Strait of Hormuz.
Iti baet dayta, inwaragawag ni United States President Donald Trump a temporaryo a maipasardeng dagiti plano a panagatake iti Iran kalpasan a maatap a kiniddaw daytoy ti Pakistani mediators.
Nupay kasta, impetteng ni President Donald Trump nga agtalinaed latta dagiti naval blockade iti Hormuz kontra iti barko ti Iran.
Sigun met iti Iran , ikonkonsiderada nga ” act of war” ti kaadda ti naval blockade sadiay ken nagpanta pay daytoy a saanda a lukatan ti Strait of Hormuz agingga saan nga agsardeng ti Estados Unidos iti panangpangtana kadakuada.
Iti agdama, saan pay laeng a nalawag nu posible iti panangrugi manen iti peace talks iti nagbaetan dagiti maseknan a pagilian. //bombokaren.c.s
