BAGUIO CITY – Nasitar ken natiliw ti dua a colorum a lugan kabayatan ti implementasyon ti checkpoint operation sadiay Purok 3, Irisan, Baguio City.
Immuna a nasitar ti maysa a van nga agmaris ti silver nga addaan plaka a CAL 4440 ken inmaneho ni Nobey Gambala, 33-anyos, residente ti Irisan, Baguio City.
Maibasar iti report ti pulisya, naduktalan nga awan ti kaskenan a dokumento a mangpaneknek a mabalin daytoy nga agbiahe kas parapubliko a transportasyon.
Naamuan a nangilugan daytoy ti 10 nga indibidual manipud lowland pastrek iti siudad ken sadiay La Trinidad, Benguet.
Naduktalan pay a nagbayad dagiti pasaherona ti sag-P300.
Kabayatanna, nasitar metlaeng iti kapada a checkpoint ti maysa a van nga agmaris ti gray nga inmaneho ni Alvin John Vargas, 26-anyos, residente ti Sanitary Camp, Baguio City.
Napaay daytoy a mangipakita ti kaskenan nga dokumento a mangpaneknek a mabalin daytoy nga agbiahe kas parapubliko a transportasyon.
Nangilugan daytoy ti 14 a pasahero a nagtaud sadiay La Union ken nagbayad dagitoy ti sag-P200.
Napalubusan a makauneg iti siudad dagiti nasao a pasahero gaputa kompleto ti dokumentoda bayat a naipaayan ti citation ticket dagiti dua a driver ken naballaagan dagitoy.
