BAGUIO CITY – Napasamak ti maysa nga insidente ti panakakuryente ken accidental fall iti maysa a construction site idiay San Vicente Multi-purpose cooperative, San Vicente, Baguio City itay nabiit.
Dagiti biktima ket 26-anyos a lalaki, construction worker, residente ti Poblacion, Tuba, Benguet ken 25-anyos a lalaki, construction worker ken residente ti Pugo, La Union.
Maibasar iti inisyal nga imbestigasyon, ik-ikkaten dagiti dua ti maysa a metal scaffolding a naka-attach iti maikadua a kadsaaran ti pasdek.
Bayat ti panangiyaramidda iti daytoy, aksidente a naisagid ti maysa a metal pipe iti primary line ti Benguet Electric Cooperative cable a nangitunda ti pannakakuryente dagitoy.
Nagresulta daytoy iti pannakatnag ti maysa kadakuada manipod iti second floor bayat a ti maysa ket naibitin ti sakana iti maysa kadagiti scaffolding.
Iti agdama, addan iti nasayaat a kasasaad ti naibitin ti saka-na a worker bayat nga under observation ti natnag a worker.//Bombo Jez Lapizar
