BAGUIO CITY – Natiliw ti dua a drug personalities iti buy-bust operation nga insayangkat dagiti otoridad sadiay Bokawkan Road, Corner P. Burgos Street, Baguio City idi kanikadua.
Nabigbig dagitoy a da Hazel Labrador Gracia, 24-anyos ken Gavin Andrei Pinlac, 18-anyos, agpada a residente ti siudad ti Baguio.
Naamuan a ni Gracia ket maysa a reloaded High Value Individual bayat a ni Pinlac ket nailista kas baro nga Street Level Individual.
Nakumpiskar manipud kadagiti dua ti dua a pakete ti maatap a shabu nga agdagsen ti agarup nasurok tallo a gramo.
Narekober iti ikotda ti naaramat a buy-bust money ken nakumpiskar pay manipud kadagitoy ti dua a rolyo ti maatap a napagango a bulong ti marijuana ken ti cellphone a naaramat iti transaksion dagiti suspek ken ti operatiba.
Sigun kadagiti otoridad, ni Gracia ket maysa a drug surenderee ti pulisya ken maipaspasidong ita iti drug surenderee rehabilitation program.
Naduktalanda a ni Pinlac ti kadwa ni Gracia iti panangibiahe ti iligal a droga nangruna iti masakupan ti Baguio.
Naduktalan pay a dagiti dua ket miembro ti Carl Adam Resurrection Group nga immunan a natiliw idi Marso ti agdama a tawen.
Iti agdama, sumangon da Gracia ken Pinlac iti kaso a panaglabsing iti Comprehensive Dangerous Drugs Act of 2002.
