BAGUIO CITY – Inaprobaranen ti Kamara iti maikatlo a panagbasa ti dua a gakat a mangkidkiddaw iti panagbalin nga independent national high schools ti dua nga annex ti Baguio City National High School (BCNHS).
Tarigagay ti House Bill 7994 ken House Bill 7995 a mapagbalin nga independent national high school ti Fort del Pilar Annex ken Hillside Annex ti BCNHS.
Sigun kenni Baguio Representative Mark Go, insakadna dagiti nasao a gakat para iti panakaipaay ti napimpintas a serbisyo kadagiti agtutubo iti siudad ken maipaayan dagitoy iti standard quality education.
Dinakamatna nga iti agdama ket agkurkurang iti staff ken resources dagiti dua a pagadalan a mangakomodar iti ad-adu pay nga estudyante nga agtaud iti kabangibang a babbarangay.
Innayonna nga iti kanito a mapaglin a linteg ti dua a gakat ket mapasayaat dagiti pasilidad ken manayonan dagiti mannursuro iti dua a pagadalan nga agresulta iti de-kalidad a panagadal dagiti ad-adu pay nga estudyante.
Maisumitir ti dua a gakat sadiay Senado para iti diliberasyon ken panagaprobar.
