Pormal a nangipilan ti dua a kameng ti Philippine Air Force (PAF) iti reklamo ti panangrames babaen ti sexual assault ken attempted rape babaen ti sexual assault iti maysa a major general iti sanguanan ti Office of the City Prosecutor sadiay Lipa City, Batangas, sigun iti legal counsel dagitoy.
Sigun kenni Atty. Nico Robert Martin, manarimaanen ti preliminary investigation dagitoy.
Maibasar iti CCTV footage, maimatangan nga agarup alas singko trenta ti agsapa idi Enero baente nuebe, maysa a black van ti nakasangpet iti Fernando Air Base idiay Lipa City.
Nakalugan dagiti kameng ti Philippine Air Force nga nagsubli manipud iti night-out.
Karaman kadakuada ti maysa a major general, a masapul a tulongan dagiti soldado nga agturong iti quarters-na.
Agarup tallo nga oras kalpasan ti napasamak, adda sabali pay a video clip a nangipakita iti dua a lallaki a soldado a rumrummuar iti pagtaengan ti opisial a makalulua.
Saan a nagbayag, simmangpet ti lieutenant, a nangipadamag iti napasamak.
Kinuna dagiti dua a ginundawayan ida ti major general.
Dagus a nagreklamo dagiti dua a soldado iti Office of Ethical Standards and Public Accountability (OESPA) ti Armed Forces of the Philippines (AFP).
Kinuna dagiti nagreklamo iti affidavit dagitoy nga idi damo, impagarupda nga agang-angaw ti major general idi imbilinna a maturogda iti quarters-na.
Sadiay metten a napasamak ti mapapati a sexual assault.
