BAGUIO CITY-Nakailista ti Regional Anti-Cybercrime Unit Cordillera ti dua a kaso ti transient scam idi napalabas nga All saint’s ken All souls day bayat a nailista pay ti innem a kaso ti online scam manipud Enero agingga Oktubre a kinse iti agdama a tawen.
Iti interview ti Bombo Radyo kenni Police Col. Maria Theresa Pucay, ti dadaulo ti Philippine National Police,Regional Anti-Cybercrime Unit,Cordillera kinunana nga ususaren dagiti scammer ti online pictures dagiti transient homes a maipost iti Facebook a pang-ayayo kadagiti turista.
Malaksid pay iti dayta, maysa pay ti online scam, pakairamanan ti nagduduma a modus dagiti scammer kas iti investment, tasking ken loan.
Kinidaw ti nasao nga opisyal kadagiti turista, ti panangtingitingda a nasayaat kadagiti kasasaoda iti online.
Innayon na pay a saan a dagus a mangipatulod dagitoy iti advance payment gapu ta daytoy ti maysa kadagiti modus dagiti transient scammer.
Kinuna pay ni Police Col. Pucay, a rumbeng nga ireport dagiti turista dagiti scammers tapno mapilaan dagitoy ti kaskenan a kaso.
Iti agdama addan dagiti nakabalod ken napilaanen ti kaso mainaig iti transient scam.
Inwaragawag pay ti nasao nga opisyal, a tapno maliklikan ti online scam ket bisitaen dagiti turista ti webpage ken hotline numbers dagiti opisina ti siudad tapno makitada dagiti legit a transient houses, accomodation, boarding house ken dadduma pay. //MarielleApat
