Nakemmeg ti maysa nga street level individual sadiay Brgy. Bakakeng Norte, Baguio City kabayatan ti naipatungpal a buy-bust operation iti nasao a barangay itay laeng kanikadua.
Ti suspek ket maysa a lalaki, agtawen iti 42, addaan iti asawa, awanan iti trabaho, ken residente iti nasao a Barangay.
Nakumpiskar kenkuana ti P884.00 nga standard drug price ti maatap a shabu nga agdagsen iti 0.13 grams ken dadduma pay a drug paraphernalia.
Naipatungpal ti nasao nga operasyon babaen iti panagtitinnulong dagiti kameng ti BCPO-PS5 ken PS10, ken PDEA-Baguio.
Kabayatanna, nakemmeg ti maysa nga indibidual sadiay Buyagan, La Trinidad, Benguet kabayatan ti naipatungpal nga anti-illegal gambling operation.
Ti nasao a suspekt ket maysa a lalaki, 35 years old, addaan iti asawa, store vendor, tubo sadiay Mountain Province, ken residente sadiay Buyagan, La Trinidad.
Maibasar iti report ti pulisya, naaktuan dagiti otoridad ti suspek nga agkolkolekta iti taya iti Small Town Lottery iti baet nga awanan daytoy iti otoridad a mangkolekta iti taya.
Nakumpiskar manipud kenkuana ti kuarta nga aggatad iti 1,150 pesos, resibo, record notebook, listaan ti STL number combinations, ken dadduma pay.
Sumango ti suspek iti kaso gapu iti panaglabsing daytoy iti PD 1602 as amended by RA 9287 wenno ti linteg a mangpadpadagsen iti pannusa kadagiti indibidual a mangipatpatungpal iti illegal gambling.
Balligi ti naipatungpal nga operasyon babaen iti nagtitipon a pwersa dagiti otoridad a pakairamanan ti Benguet PIU/PDEU, La Trinidad MPS, ken PIT Benguet-RIU 14.//Bombo Genzel Depayso
