Naipaayan iti temporaryo a pannakawayawaya ti dua a lalaki kalpasan a nagbayad dagitoy iti tig P3,000 pesos a piyansa.
Maipalagip a nakemmeg dagiti dua a suspek kalpasan a naaktuan dagitoy ti maysa a security guard sadiay Burnham Park a mangipatpatungpal iti sexual activity itay laeng nabiit.
Ti maysa a suspek ket maysa a lalaki, addaan iti asawa, 46 years old, tubo sadiay Mt. Province ken residente sadiay Kennon Road, Baguio City.
Ti kadua daytoy ket maysa metlaeng a lalaki, awanan iti asawa, 27 years old, tubo sadiay Nueva Ecija, ken residente sadiay Legarda Road, Baguio City.
Maibasar iti report ti pulisya, manarimaan ti panagronda ti security guard sadiay Biking Lane, Inner Lake Drive, Burnham Park, Baguio City idi nakitana ti saan a rumbeng nga ar-aramiden dagiti dua a lalaki a mainaig iti grave scandal.
Gapu iti dayta, immawag ti security guard iti tulong kadagiti kakaduana a nangitunda met iti pannakaarestar dagiti suspek.
