BAGUIO CITY – Naibalud ti dua nga indibidual gapu iti kaso a robbery with intimidation kalpasan ti panag-hold-up dagitoy iti maysa a panganan sadiay Dagupan Centro, Tabuk City, Kalinga idi rabii.
Nabigbig dagitoy a da Manuel Tolentino, 24-anyos, furniture helper, residente ti Antadao, Sagada, Mountain Province ken Jim Jim Garcia, 20-anyos, residente ti Tabuk City, Kalinga.
Nailanad iti report ti Tabuk City Police Station a nakaawatda ti report seknan iti panang-hold-up dagiti dua a suspek iti Sandi-uy Restaurant ken nagaramat pay dagitoy iti paltog.
Dagus a nagresponde dagiti pulis ken sadiay a nadanunda dagiti dua a suspek nga aglibasen kuma babaen iti motorsiklo.
Natiliw dagiti suspek ken nakumpiskar kadagitoy ti maysa a caliber 45 pistol a naglaon ti maysa a magazine a naglaon met ti pito a bala ken P640 a kwarta.
