KAPANGAN, BENGUET – Pimmusay ti 29-anyos ken 47-anyos a lallaki kalpasan a maatap a naiyanod ken nalmes dagitoy idiay Pey-og River idiay Brgy. Boklaoan, Kapangan Benguet idi Mayo 30, 2026.
Nabigbig dagiti biktima a da Mehares Dempoy Talibio, 47-anyos ken Tamar Clifford Maik, 29-anyos, agkasinsin a residente ti Sitio Imbangol, Brgy. Boklaoan.
Iti interview ti Bombo kenni FO2 Charleston B. Pasigon ti BFP Kapangan, kinunana a nagturong dagiti biktima iti Pey-og River tapno agbani-it idi May 27, 2026.
Nupay kasta, nagdanag dagiti pamilya ken kabagian dagitoy kalpasan a saanda a nagaw-awid.
Gapu iti dayta, biniruk dagiti kabagianda idi May 30 kadagiti sumagmamano a paset ti Pey-og River.
Ditoy metten a nasarakan ti tumtumpaw a bangkay dagiti biktima iti nagsina a paset ti nasao a karayan.
Sigun kenn FO2 Pasigon, naitawag kadakuada ti insidente iti pasado 7:10 p.m idi Sabado.
Dagus a nangisayangkat dagitoy iti retrieval operasion ken balligi a na-retrieve dagiti bangkay iti pasado 9:00 p.m ti kapada nga aldaw.
Naisayangkat ti Daw-is sakbay a naiturong ti bangkay dagiti biktima iti pagtaengan dagitoy.
Sigun kenni FO2 Pasigon, naituding a maitabon ti bangkay ti 29-anyos a biktima intun Lunes, June 01 bayat a malamayan ti bangkay ti 47-anyos a biktima.
Balligi ti operasion babaen iti panagregget dagiti personnels ti Kapangan Fire Station , MDRRMO Kapangan , Kapangan MPS, opisiales ti Barangay Boklaoan ken dagiti maseknan nga residente.
Kabayatanna, agpalpalagip ti BFP-Kapangan iti publiko a kanayon a tungpalen dagiti safety precautions iti asideg dagiti karayan, nangruna kadagiti saan a mapakpakadaan a kasasaad ti danum iti karayan.//mp4
