BAGUIO CITY – Nagpositibo iti COVID-19 ti dua a mayor iti Cordillera Region.
Maibasar iti waragawag ni Buguias, Benguet Mayor Ruben Tinda-an iti social media, positibo ti reswulta ti swab test daytoy idi kanikadua.
nupay kasta, impasiguradona met a nasayaat ti kasasaadna ken awan ti marikriknana a nakaro a sintomas.
Innayonna a maipasidong daytoy iti quarantine tapnu maipasigurado a saanna a maiyakar ti virus kadagiti dadduma.
Dinakamatna pay nga ituloyna latta ti agtrabaho nga uray naka-quarantine daytoy iti pagtaenganda tapnu saan a masinga ti panangipaay ti lokal a gobyerno iti serbisyo publiko.
Kagiddan iti daytoy, impalagipna manen ti peggad nga ituntunda ti COVID-19 ken kinunana a nasken a saan nga iyaleng-aleng ti publiko ti nasao a sakit tapnu masalwadan ti bagida ken ipatpategda iti biyag.
Kabayatanna, imbinglay met ni Pidigan, Abra Mayor Joseph Valera a positibo ti resulta ti panakaipasidongna iti RT-PCR test idi April 3 kalpasan a nagbalin a close contact daytoy ti maysa a pimmusay nga addaan ti COVID-19.
Kinunana nga adda dagiti marikriknana a sintomas ken agdama a maipaspasidong iti home quarantine bayat a marimaan ti contact tracing kadagiti nakapulpulapol daytoy.
